ਅੱਗ ਦੀ ਮਾਂ..

ਮਾਏਂ ਮੈਂ ਅੰਬੀ ਦੀ ਛਾਵੇਂ..

ਤੇਰੇ ਬਾਰੇ ਸੋਚ ਰਿਹਾ ਹਾਂ..

ਬੀਤੇ ਕੱਲ੍ਹ ਨੂੰ ਨੋਚ ਰਿਹਾ ਹਾਂ ..

ਆਉਂਦੇ ਕੱਲ੍ਹ ਨੂੰ ਲੋਚ ਰਿਹਾ ਹਾਂ ..

ਵਰਤਮਾਨ ਨੂੰ ਮਾਣ ਰਿਹਾ ਹਾਂ

ਆਪਣਾ ਆਪ ਪਛਾਣ ਰਿਹਾ ਹਾਂ

ਉੱਡਦੀ ਜਾਂਦੀ ਅੱਕ ਦੀ ਕੁੱਕੜੀ

ਬੋਚ੍ਹ ਬੋਚ੍ਹ ਕੇ ਬੋਚ ਰਿਹਾ ਹਾਂ..

ਏਹਦੇ ਨੂਰੀ ਚੇਹਰੇ ਵਿੱਚੋਂ

ਤੇਰਾ ਮੁੱਖੜਾ ਨਜ਼ਰੀਂ ਪੈਂਦਾ..

ਆਲੀਆਂ-ਭੋਲੀਆਂ ਗੱਲਾਂ ਕਰਦਾ

ਮੈਨੂੰ ''ਨੰਨੂ-ਕਾਕਾ '' ਕਹਿੰਦਾ..

ਮੇਰੇ ਸਾਵੇਂ ਆ ਬਹਿ ਜਾਂਦਾ..

ਮੈਨੂੰ ਗੋਦੀ ਦੇ ਵਿੱਚ ਪਾਕੇ

ਅੰਬਰਾਂ ਵਿੱਚ ਉੜਾ ਲੈ ਜਾਂਦਾ..

ਮੇਰੇ ਵਾਲਾਂ ਨੂੰ ਸਹਿਲਾਉਂਦਾ..

ਮਿੱਠੀ-ਮਿੱਠੀ ਲੋਰੀ ਗਾਉਂਦਾ.......

ਮਾਂ ਤਾਂ ਮੈਥੋਂ ਦੂਰ ਬੜੀ ਹੈ

ਮਾਂ ਤਾਂ ਮੇਰੇ ਕੋਲ ਖੜੀ ਹੈ

ਮੇਰੇ ਮਨ ਵਿੱਚ ਘੋਰ-ਹਨੇਰਾ

ਉੱਪਰੋਂ ਕੈਸੀ ਗਰਦ ਚੜ੍ਹੀ ਹੈ

ਧੁੰਦਲਾ ਧੁੰਦਲਾ ਦਿਸਦਾ ਮੈਨੂੰ

ਓਹ ਓਥੇ ਮੇਰੀ ਮਾਂ ਖੜੀ ਹੈ..

ਗਰਦ ਹਟਾਉਂਦੀ ਆ ਰਹੀ ਹੈ

ਦੀਪ ਜਗਾਉਂਦੀ ਆ ਰਹੀ ਹੈ...

ਮੇਰੀ ਮਾਂ ਤਾਂ ਸ਼ੀਹਣੀ ਵਰਗੀ

ਮੇਰੀ ਮਾਂ ਤਾਂ ਫੁੱਲਾਂ ਵਰਗੀ

ਯੋਧੇ ਦੀ ਲਲਕਾਰ ਜਿਹੀ ਹੈ

ਥਰ-ਥਰ ਕੰਬਦੇ ਬੁੱਲ੍ਹਾਂ ਵਰਗੀ...

ਕਿਰਤੀ ਦੇ ਖੂਨ-ਪਸੀਨੇ ਵਰਗੀ

ਵਰ੍ਹਦੇ ਸਾਉਣ ਮਹੀਨੇ ਵਰਗੀ

ਜਾਂ ਫਿਰ ਕਾਸਦ ਚੀਨੇ ਵਰਗੀ

ਜੋ ਛੇੜੇ ਦਿਲ ਦੀ ਤਾਰ..

''ਮੇਲਾ ਬੱਚੂ'' ''ਮੇਲਾ ਨੰਨੂ''

ਮਾਂ ਕਰਦੀ ਬੜਾ ਪਿਆਰ..

ਏਸ ਪਿਆਰ ਨੂੰ ਸਮਝੇ ਕੋਈ

ਦਿਲ ਵਾਲਾ ਦਿਲਦਾਰ..

ਪੈਰਾਂ ਨੂੰ ਮਾਂ ਬੜਾ ਸਜਾਉਂਦੀ

ਪੈਰਾਂ ਦੇ ਵਿੱਚ ਝਾਂਜਰ ਪਾਉਂਦੀ

ਛਣਕ-ਛਣਕ ਛਣਕਾਰ ਦੇ ਅੰਦਰ

ਰੁਦਨ ਕਰੇ ਕਰਤਾਰ..

ਰੁਦਨ ਕਰੇ ਕਰਤਾਰ...ਉਫ਼ ....!!!

ਮਾਂ ਜਦ-ਜਦ ਵੀ ਗੱਲਾਂ ਕਰਦੀ

ਮੇਰਾ ਮਨ ਭਰ ਆਉਂਦਾ..

ਮਾਂ ਜਦ ਹੱਸਦੀ

ਮਾਂ ਜਦ ਰੋਂਦੀ

ਮੇਰਾ ਮਨ ਭਰ ਆਉਂਦਾ ..

ਖੰਡੇ ਦੀ ਲਿਸ਼ਕੋਰ ਜਿਹੀ ਹੈ

ਪੈਲਾਂ ਪਾਉਂਦੇ ਮੋਰ ਜਿਹੀ ਹੈ..

ਮਾਂ ਤਾਂ ਆਪਣੀ ਝਾਂਜਰ ਵਾਲੇ

ਬੜੇ ਉਦਾਸੇ ਬੋਰ ਜਿਹੀ ਹੈ...

ਮਾਂ ਤਾਂ ਆਪਣੇ ਬੋਲ ਜਿਹੀ ਹੈ

ਅੰਬਰ ਜਿੱਦੀ ਝੋਲ ਜਿਹੀ ਹੈ..

ਮਾਂ ਕਿਓਂ ਹੰਝੂ ਡੋਲ੍ਹ ਰਹੀ ਹੈ ...

ਚੁੱਪ !!!!

ਮਾਂ ਕੁਝ ਬੋਲ ਰਹੀ ਹੈ ...

ਨਹੀਂ! ਮੇਰੀ ਮਾਂ ਤਾਂ ਮੇਰੇ ਵਰਗੀ

ਮੇਰੀ ਮਾਂ ਨਾ ਹੋਰ ਜਿਹੀ ਹੈ..

ਮਾਂ ਦੇ ਨਿਰਮਲ ਹਾਸੇ ਅੰਦਰ

ਮਾਂ ਦੇ ਨਿਰਛਲ ਹਾਸੇ ਅੰਦਰ

ਉਮਰਾਂ ਦਾ ਗ਼ਮ ਬੋਲ ਰਿਹਾ ਹੈ..

ਸ਼ਾਇਦ ਮੈਨੂੰ ਟੋਲ ਰਿਹਾ ਹੈ..

ਮਾਂ ਤਾਂ ਮੇਰੀ ਚੁੱਪ ਜਿਹੀ ਹੈ

ਮਾਂ ਤਾਂ ਮੇਰੇ ਸ਼ੋਰ ਜਿਹੀ ਹੈ...

ਮਾਂ ਤਾਂ ਸ਼ਾਮ-ਸੰਧੂਰੀ ਲਗਦੀ

ਮਾਂ ਤਾਂ ਪੈਲਾਂ ਪਾਉਂਦੀ ਸਰਘੀ

ਮੈਂ ਆਪਣੀ ਮਾਂ ਵਰਗਾ ਹਾਂ ਜਾਂ

ਮਾਂ ਹੈ ਬਿਲਕੁਲ ਮੇਰੇ ਵਰਗੀ???

ਚਕਲੇ ਅੰਦਰ ਰੀਝ ਚਿਰੋਕੀ

ਤਿਲ-ਤਿਲ ਮਰਦੀ ਜਾਵੇ ..

ਐਸੀ ਮਾਂ ਦੀ ਮਮਤਾ ਐਵੇਂ

ਧੰਦੇ ਵਿੱਚ ਰੁਲ ਜਾਵੇ..

ਉੱਪਰੋਂ ਸਜੀ-ਸਜਾਈ

ਤੇ ਅੰਦਰੋਂ ਭਰੀ ਭਰਾਈ..

ਇਹ ਵੀ ਮਾਂ ਹੈ..

ਇਹ ਵੀ ਮਾਂ ਹੈ ..

ਐਸੀ ਮਾਂ ਨੂੰ ਸਲਾਮ !!

ਖੈਰ..!!

ਅੰਮਾ ਸਾਡਾ ਸਾਕ ਪੁਰਾਣਾ

ਝੱਲਾ ਝੱਲਾ ਬੜਾ ਸਿਆਣਾ

ਨਾਲ ਚਿੜੀ ਤਸ਼ਬੀਹਾਂ ਦੇਵਾਂ

ਬੋਟ ਦੇ ਮੂੰਹੀਂ ਦਾਣਾ ਪਾਉਣਾ

ਕੋਈ ਨਾ ਸਮਝੇ..ਕੋਈ ਨਾ ਜਾਣੇ..

ਜੱਗ ਤਾਂ ਅੰਨ੍ਹਾ,ਟੀਰਾ,ਕਾਣਾ...

ਜੱਗ ਤਾਂ ਅੰਨ੍ਹਾ,ਟੀਰਾ,ਕਾਣਾ..

ਮਾਂ ਦੇ ਸਾਂਵੇ ਲਿਫ਼-ਲਿਫ਼ ਜਾਵਣ

ਸੈਅ ਚੰਨਾਂ ਦੇ ਚਾਨਣ....

ਮਾਂ ਦੇ ਨੈਣੀਂ ਬਿਰਹੋਂ-ਰਾਣੀ

ਆਉਂਦੀ ਪੀੜਾਂ ਮਾਨਣ...

ਮਾਂ ਤਾਂ ਐਸੇ ਬਾਗ ਦੀ ਮਾਲਣ

ਜਿਥੇ ਫੁੱਲੋਂ-ਪੱਤੀਓਂ ਪਹਿਲਾਂ

ਕੰਡਿਆਂ ਦਾ ਹੁੰਦਾ ਹੈ ਪਾਲਣ..

ਕਦੇ-ਕਦਾਈਂ ਲਗਦਾ ਮੈਨੂੰ

ਮਾਂ ਤਾਂ ਜੰਮੀ ਹਾਸੇ ਭਾਲਣ..

ਸੁੱਖਾਂ ਪਿੱਛੇ ਖਾਕਾਂ ਛਾਨਣ..

ਰੋ-ਰੋ ਆਪਨੇ ਦੀਦੇ ਗਾਲਣ....

ਅੱਗ ਦੀ ਰੁੱਤੇ ਜੰਮੀ-ਜਾਈ

ਅੱਗ ਦੀ ਜੂਨ ਹੰਢਾਈ..

ਅੱਗ ਦੀ ਉਮਰੇ ਮਾਂ ਮੇਰੀ ਨੇ

ਅੱਗ ਨੂੰ ਅੱਗ ਲਗਾਈ..

ਅੱਗ ਦਾ ਵਟਣਾ ਮਲਿਆ

ਮਾਂ ਨੇ ਅੱਗ ਦੀ ਮਹਿੰਦੀ ਲਾਈ

ਮਾਂਗ ਦੇ ਵਿੱਚ ਬਾਰੂਦ ਖੌਲਿਆ

ਅੱਗ ਦੀ ਝਾਂਜਰ ਪਾਈ.....

ਕੰਨੀਂ ਲਟਕਣ ਆਤਿਸ਼ਪਾਰੇ

ਬਲਦੀ ਬਿੰਦੀ ਲਾਈ..

ਬਲਦੀ ਬਿੰਦੀ ਲਾਈ...

ਇੱਕ ਦਿਨ 'ਉਸ' ਗੰਧਲੇ ਪਾਣੀ ਨੇ

ਮਾਂ ਦੀ ਅੱਗ ਵਧਾਈ..

ਫਿਰ..ਫਿਰ...

ਫਿਰ ਓਸੇ ਦਿਨ ਤੋਂ ਮਾਂ ਮੇਰੀ ਨੇ

ਲੋਹੜੀ ਦੀ ਅੱਗ ਕੁੱਛੜ ਚਾਈ...

ਲੋਹੜੀ ਦੀ ਅੱਗ ਕੁੱਛੜ ਚਾਈ...

ਲਪਟਾਂ ਛੱਡਦੀ ਕਾਨੀ ਦੇ ਸੰਗ

ਅੱਗ ਦੇ ਅੱਖਰ ਵਾਹੀ ਜਾਵੇ..

ਅੱਗ ਦੀ ਮਿੱਟੀ..ਅੱਗ ਦਾ ਪਾਣੀ

ਅੱਗ ਦੇ ਬੂਟੇ ਲਾਈ ਜਾਵੇ...

ਫੁੱਲ ਆਤਿਸ਼ੀ ਪੈਂਦੇ ਜਾਵਣ

ਅਗਨ-ਕਹਾਣੀ ਕਹਿੰਦੇ ਜਾਵਣ..

ਤੱਤੀ-ਤੱਤੀ...ਰੱਤੀ-ਰੱਤੀ...

ਮਹਿਕ ਓਹਨਾਂ 'ਚੋਂ ਆਈ ਜਾਵੇ

ਸੁੱਤਾ ਦੇਸ਼ ਜਗਾਈ ਜਾਵੇ..

ਖੂਨ ਉਬਾਲੇ ਖਾਈ ਜਾਵੇ..........

ਮਾਂ ਤਾਂ ਅੱਗ ਵਿੱਚ ਸੜਦੀ ਜਾਵੇ

ਮਾਂ ਤਾਂ ਅੱਗ ਵਿੱਚ ਰੜਦੀ ਜਾਵੇ

ਵਿੱਚ ਅਗਨ ਦੇ ਹੜਦੀ ਜਾਵੇ

ਅੱਗ ਦੀਆਂ ਲਪਟਾਂ ਫੜਦੀ ਜਾਵੇ...

ਅੱਗ ਵਿੱਚ ਜਲਦੀ ਮੇਰੀ ਅੰਮੀ

ਅੱਗ ਦੀ ਕਵਿਤਾ ਲਿਖਦੀ ਜਾਵੇ

ਅੱਗ ਦੀ ਕਵਿਤਾ ਪੜ੍ਹਦੀ ਜਾਵੇ..

ਅੱਗ ਦਾ ਚਰਖਾ

ਅੱਗ ਦੀ ਪੂਣੀ

ਅੱਗ ਦਾ ਕੱਤਿਆ ਸੂਤ

ਨੀਂ ਮਾਂ ਤੂੰ ਅੱਗ ਦਾ

ਕੱਤਿਆ ਸੂਤ.........

ਅੱਗ ਦੀ ਜਾਂ ਹੈ

ਅੱਗ ਦੀ ਰੂਹ ਹੈ

ਅੱਗ ਦਾ ਹੈ ਕਲਬੂਤ ਨੀ ਮਾਂ

ਅੱਗ ਦਾ ਹੈ ਕਲਬੂਤ..

ਅੰਮਾ ਜਦ ਤੂੰ ਗੀਤ ਸੁਣਾਵੇਂ

ਹਵਾ ਦੀ ਸ਼ੂਕਰ ਵੀ ਸ਼ਰਮਾਵੇ

ਪੱਤ-ਵਿਹੂਣੇ ਰੁੱਖੜੇ ਉੱਤੇ

ਇੱਕਦਮ ਜੋਬਨ ਨਜ਼ਰੀਂ ਆਵੇ..

ਪਰ ਮੈਂ ਚੁੱਪ ਦਾ ਆਸ਼ਕ ਮਾਏ

ਚੁੱਪ ਚੁੱਪ ਬੈਠਾ ਸੁਣਦਾ ਜਾਵਾਂ..

ਚੁੱਪ ਚੁੱਪ ਦੇ ਵਿੱਚ ਬਾਤਾਂ ਪਾਵਾਂ

ਤੈਥੋਂ ਐਨਾ ਕਿਓਂ ਸ਼੍ਰ੍ਮਾਵਾਂ,,

ਇੱਕਦਮ ਚੁੱਪ ਦੇ ਵਿੱਚ ਖੋ ਜਾਵਾਂ..

ਤੈਥੋਂ ਐਨਾ ਕਿਓਂ ਸ਼੍ਰ੍ਮਾਵਾਂ..

ਹਾੜ੍ਹ ਵੀ ਅੱਗ ਬਰਸਾਏ ..

ਭਾਂਵੇ ਤਪਦਾ-ਤਪਦਾ ਜਾਵੇ..

ਭੁੱਜਦਾ-ਭੁੱਜਦਾ ਦਿਨ ਮਾਏ

ਮੈਨੂੰ ਠੰਡਾ ਕਰਦਾ ਜਾਏ..

(ਅੱਜ ਦਾ ਦਿਨ..18 june)

ਮਾਂ ਦੀ ਜ਼ਾਫਰ ਹਾਸੀ ਅੰਦਰ

ਮੇਰੀ ਤਾਂ ਬੱਸ ਰੂਹ ਵਸਦੀ ਹੈ..

ਸਾਡੇ ਪਿੰਡ ਦੀ ਜੂਹ ਵੱਸਦੀ ਹੈ..

ਸਾਡੇ ਪਿੰਡ ਦੀ ਜੂਹ ਵੱਸਦੀ ਹੈ....

ਦੁੱਧੀਂ ਛੱਟਾ ਕੀਹਨੇ ਦਿੱਤਾ

ਰਾਤ ਹਨੇਰੀ ਰੰਗਾ..

ਕੀਹਨੇ ਘੋਲੀ ਕੀਹਨੇ ਘੋਲੀ

ਲਹੂ ਦੇ ਵਿੱਚ ਸਫੈਦੀ..

ਆਪਣੀ ਮਾਂ ਦੀ ਗੋਦੀ ਅੰਦਰ

ਦੁੱਧ-ਵਰੇਸ ਹੈ ਕੈਦੀ...

ਦੁੱਧ-ਵਰੇਸ ਹੈ ਕੈਦੀ...

ਐਸੇ ਕੌੜੇ ਦੁੱਧ ਨਾਲੋਂ ਓਹ

ਗਰਭੇ ਹੀ ਮਰ ਜਾਏ..

ਗਰਭੇ ਹੀ ਮਰ ਜਾਏ ..

ਅਗਨ-ਪਰਿੰਦੇ ਵਾਂਗੂੰ ਬਲ ਜਾਏ..

ਉੱਡ ਜਾਏ ਰਾਖ ਦੁਰੇਡੇ ਟਿੱਲੇ

ਉੱਡ ਜਾਏ ਰਾਖ ਦੁਰੇਡੇ ਟਿੱਲੇ

ਰਹਿਮਤ ਵਾਲੀ ਵਰਖਾ ਹੋਵੇ

ਰਾਖ ਤੋਂ ਅੰਡਾ ਬਣ ਬਣ ਜਾਵੇ..

ਸੋਨੇ ਰੰਗੀਆਂ ਸਧਰਾਂ ਦੇ ਸੰਗ

ਬੱਚਾ ਕਿਧਰੇ ਉੱਡ-ਪੁੱਡ ਜਾਵੇ

ਬੱਚਾ ਕਿਧਰੇ ਉੱਡ-ਪੁੱਡ ਜਾਵੇ

ਤੇਰਾ ਦੁੱਧ ਸਾਵਣ ਤੋਂ ਸਾਵਾ

ਲਾਲੀ ਨਾਲੋਂ ਰੱਤਾ...

ਚਿੱਟੇ ਦਿਹੁੰ ਤੋਂ ਚਿੱਟਾ ਮਾਏ

ਸੂਰਜ ਨਾਲੋਂ ਤੱਤਾ..

ਪੋਹ ਦੀ ਕੋਸੀ ਧੁੱਪ ਤੋਂ ਕੋਸਾ

ਹਿੱਕੜੀ ਵਾਲਾ ਸੇਕ..

ਤੇਰੇ ਸਿਰ ਤੋਂ ਗੀਤ ਵਾਰਦਾ

ਤੇਰਾ ਪੁੱਤੂ ਵੇਖ ....

ਤੇਰਾ ਪੁੱਤੂ ਵੇਖ ....

'ਕੱਲਾ-ਕੱਲਾ ਲਫਜ਼ ਨੀ ਮਾਏ

ਤੇਰੇ ਮੋਹ ਦਾ ਜਾਇਆ..

ਮਾਏ ਸਿਰ 'ਤੇ ਹੇਠ ਰੱਖ

ਤੇਰਾ ਪੁੱਤੂ ਆਇਆ.........ਹਰਮਨ